İsmailiyyə Sarayı - Bakı milyonçusu Musa Nağıyev tərəfindən
oğlu İsmayılın şərəfinə Qotik üslubda inşa etdirilmişdir. Sarayın
memarı polşalı İ. K. Ploşko olmuşdur. Saray, əvvəlcə, Müsəlman Xeyriyyə Cəmiyyətinin
qərargahı kimi istifadə olunsa da, hazırda bu binada Azərbaycan Milli Elmlər
Akademiyasının Rəyasət Heyəti yerləşir.
Bu gün elm ocağına çevrilən abidə
zaman-zaman Azərbaycan tarixində baş verən faciələri də özündə yaşadıb. Azərbaycanın
müstəqillik ideyaları da ilk dəfə məhz bu binada səslənib.
“İsmailiyyə”nin tikilməsinin maraqlı
tarixçəsi var. Belə ki, Ağamusa Nağıyevin oğlu İsmayıl vərəm xəstəliyinə
tutulur. Bakı milyonçularının ailələrini müalicə edən həkim Varatapedov
İsmayılı müayinə etdikdən sonra Musa Nağıyevə deyir ki, oğlunun vəziyyəti çox
ağırdır. Əgər tez tədbir görülməsə, o ölə bilər, müalicə üçün 50 min manata
ehtiyac var. Hətta həkim milyonçuya təklif edir ki, oğlunu özü İsveçrəyə
aparıb, 1 il ərzində müalicə etdirib gətirəcək. Musa Nağıyev deyir ki, yalnız
10 min manat verə bilər. Söhbət bununla da bitir. Lakin İsmayılın halının
gün-gündən pisləşdiyini görən milyonçu son anda onun müalicəsi üçün 50 min
manat verməyə razı olur. Lakin bu gecikmiş bir addım olur. Belə ki, həkim xəstəni
yoxlayandan sonra xəbər verir ki, iş-işdən keçib, indi onu heç 100 min manatla
da müalicə etmək mümkün deyil. Hacı Zeynalabdin Tağıyevin xahişi ilə həkim Məhəmməd
Rza Vəkilov İsmayılı İsveçrəyə aparır. Müalicədən sonra onun halı nisbətən
yaxşılaşsa da, çox yaşamır. Ağamusa Nağıyevə oğlunun xatirəsinə bina tikdirmək
təklifi isə Hacı Zeynalabdin Tağıyevdən gəlir.
Binanın memarı Ploşkonun etirafına görə,
onun ən böyük arzularından biri Bakının mərkəzində, Azərbaycanın milli
ornamentləri ilə bəzədilmiş əzəmətli binanın layihəsini işləmək imiş. Arzusuna
çatan memar Ağamusa Nağıyevə öz minnətdarlığını bildirir. Binanın divarlarına
vurulmuş naxışlar tamaşaçıları valeh edir. Venesiya qotikası üslubunda tikilmiş
dəbdəbəli saray çox plastikdir və yaxşı işlənib. Binanın yuxarısında ilk
vaxtlar Qurani-Kərimdən ayələr olub. Lakin bolşeviklər Azərbaycanı işğal etdikdən
sonra həmin yazıları silib, məhv etmişlər. Tikilinin əsas arxitektura elementləri
birinci mərtəbədə yerləşir. Bakının tarix-memarlıq abidələri sırasında bu bina
özünə xüsusi yer tutub.
31
mart 1918-ci ildə bina ermənilər tərəfindən yandırıldı. Amma təsəlliverici məqam
odur ki, “İsmailiyyə”nin arxivi yandırılsa da, özülünü məhv edə bilmədilər.
“İsmailiyyə”nin yandırılması Musa Nağıyevin ağır iztirablarına səbəb olur. Onun
oğlu İsmayılın şərəfinə sarayın foyesində ucaltdığı möhtəşəm heykəl də ermənilər
tərəfindən məhv edilir. Bina yalnız cümhuriyyət dövründə bərpa olundu.
Saray Azərbaycan Respublikası Nazirlər
Kabinetinin 2 avqust 2001-ci il qərarı ilə ölkə əhəmiyyətli daşınmaz tarix və mədəniyyət
abidəsi kimi qorunur.